Lykerveal Finland de koronapandemy betto beater ünder kontrolle holden het as de meyrsten landen in Europa, vecht sik ouk hyr de musikbranche döär laege tyden. Summertyds sünt de festivals uutvullen, ouk nu is dat swöär koncerten to organiseren un dat skal seakers noch en stout sou blyven. De organisatorslüde van Tuska, dat grötste metalfestival in Noordeuropa, wüllet nu uut de noud en döägde maken döär en vrisk koncept, wårneam se koncerten med en reiseprogram kombineret.
Düt metalreiseprogram skal de tokykerslüde as en slag reiseserye nå mooie rebeden in Finland vören, wårneam de bänds an skyre steaden spealet un interviews geavet. Interesseerde van butenlands büdt düt soudännig de sjangs beid vorsküllen facetten van Finland un finske metalmusik kennen to leyren. Aktuel sünt dree deylen vardig draid un vöär de tokumst sünt noch meyr plaand.
Den trailer (leiders man in ingelsk) köänet jüm sik hyr bekyken: https://www.youtube.com/watch?v=OGSVS8xcYIs
Elken deyl van de serye duurt eyn stünde un besteit uut en koncert, en bändinterview un en vöärstelling van de regioon, wårneam dat koncert den grötsten deyl van uutmaakt. De deylen sünt vöär en 48 stündens tyd togänglik, ümdat eyn dat anders vöär vordragstechniske oorsaken ni as koncert vorköypen dörs. Weren de koncerten duurhaftig binnennets togänglik, dean dee as album tellen un do gungen de höyvdinkumsten ni an de musikers- un technikerslüde in’n achtergrund, dee düt koncept jüstement stütten skal, man an de plattenfirmas.
Negativ upvullen is my de beslut vöär ingelskspråkigheid, man echt öäverrasked het dee my trurigerwyse ni, ümdat dat leiders typisk is vöär Finland vandage, wat en bült lüde dat vöär internationaliteet holdet de eygen språklike männigvoldigheid achter (torechtbroaken) ingelsk to vorsteaken. Sünderlik afsurd düch my dat in dat interview, wårneam finske lüde in rallienglanti en pår frasen uutwesselet staads in ear eygen språke en vlödig interview med wat meyr deepgang to vören. Dat had eyn döär en ingelsk üntertiteld interview in en inheymske språke düüdlik beater löysen kund. Boavento had dat de tokykers:ken van butenlands en internationaler beleavnis boaden, döärdat see nå de musikerslüde in dee ear eygen språke hadden luusteren kund. Tominst singet Turmion Kätilöt grötstendeyls in finsk un bedet soudännig ouk dee lüde wat, dee språklike männigvoldigheid in de metalscene waerd tokennet.
Den reiseberichtdeyl vund ik ni laeg, lykerveal ik den natüürlik lever in eyn van de inheymsken språken volgd weer. Ofskounst ik nu al öäver en veer jårs tyd in Helsingfors/Helsinki woane, hev ik doch en beaten wat nys to weaten kreagen, un ouk vöär metalfäns, dee (jichtenswaneyr in de tokumst…) van butenlands de stad besöken koamet, is dår wis wat nüts mang.
Elken vrisken deyl van de serye is van vrydagåvend af an bet sündagåvend to bekyken. En echt fysisk koncertbeleavnis deit dat natüürlik ni lykkoamen, man lykers vund ik de idee al en vorbeatering to de ströymden livekoncerten uut leddige koncerthallen, studios or lyks, wat ik vantjår betto seen hev. De koncerten van de ingelskspråkigen bänds skal ik wul ni volgen, man by bänds, dee in interessanter språken singet, koame ik gaern wedder luusteren.
Dat eyrste leed uut dat koncert van Turmion Kätilöt is vry to beluusteren: https://www.youtube.com/watch?v=Cocx59P5EQk
Vöär de achtergrundinformationen to Tuska Utopia hev ik my up düssen artikel uut de Helsingin Sanomat betrokken: https://www.hs.fi/kulttuuri/art-2000007220241.html
Dat skermbild boaven is van de officielle festivalwebsteade https://www.tuska.fi/fi/tuska-utopia/tuska-utopia
Anmarking: Dat is neyn betaalde reklame, as abonnentske van de Helsingin Sanomat kun ik dat koncert al sou gråtis volgen.