As wis tominst de platsnakkers uut Noorddüütskland weatet, is de roude grütte (düütskbaseerd skreaven rode Grütt, in düütsk rote Grütze, in däänsk rødgrød) en populäär traditionel eatend uut Noorddüütskland un Däänmark. Eygens koakt eyn dee höyvdsaaklik uut roude beien, man ümdat ik jüst sou veal düüstere in’t huus had, is dat endresultaat eyr vigelet as roud worden. Smekken deit dee lykers.
Uut düt recept krigt eyn üm un by veer portionen. Sülven eate ik ni gaern bannig sööt un neame soudännig minder sukker, wat de grütte en beaten suur blyven löt. Wokeyn de grütte lever sööt eaten mag, mut dårvöär eyn or twey eatleapels meyr sukker bygeaven. As beien hev ik aerdbeien, bikbeien un (roude un swarte) jehansbeien noamen, man de grütte löt sik natüürlik ouk uut ander beiensoorten koaken:
600 g beien/bearen
400 ml saft uut jehansbeien
3 (afstreaken) eatleapels sukker
4 eatleapels setmeal (DE Stärke), as byspil uut mais
2 eatleapels citronensaft
kaneel (DE Zimt), as eyn mag
Dårtogeaven kan eyn good vaniljesauce or vaniljeys.
De beien med 300 ml jehansbeisaft, sukker, citronensaft un kaneel mengeleren un by syde (/laege) temperatuur üm de tein minuten licht koaken låten. Setmeal med 100 ml jehansbeisaft mengeleren, to de beien in den put geaven, good ümrören un noch eyns kört to koaken bringen. Nu man noch de grütte afkölen låten, dän is dat ouk al torecht. Goden hunger!